نقمش كوزكمسه اتشه يا چراغه و ياكونشه طوتلدقده نقشى ظاهر اولور و يدنجى قسمنك اولكى شهرينه خنساى ديرلر كه اول شهرى بو ولايتدن او نبش كمسنه كورمشلردر انلردن بريسى نقل ايتديكه اول شهرك بيوكلكى اول مرتبه ده دركه كنار شهردن بر صباح سعى ايدوب يوريدك اخشام اولدقده نصفنده كلوب قوندق ايرتسى قالقوب مغرب وقتنده شهرك اخرنده نزول ايلدك اول جماعت دخى بونك كلامى صحيحدر خطانك اكثر شهرلرى بو منوال اوزره در و خانبالغ خود شهر عظيم اولديغى و صفت و مقدارى سابقا ذكر اولنمشيدى و خطاييلرك باننده و شهرلرنيك بيوكلكى و كوچكلكى عدد حساب ابجد كبيدر و خلقك غلبه و كثرتنه سوز يوقدر و سكزنجى قسمنه يونن ديرلر كه ربع مسكونك نهايتنده واقع اولمشدر ايكى طرفى دريا بر جانبى بردر كه ايكى ايلق مسافه مقدارى حندق كسوب ديوار چكمشلر در و سببى اولدر كه زمان اواتلده اول ديارك حكومتى غيرى حاكملره متعلق اولوب حالا اهل چين اول بلده‌يى تسخير ايدوب ضبط ايتمشلر در و اول دياردن كثرت اوزره اعلا و ادنى انجو خصوصا لؤلؤ لالا حاصل اولمغله غايتده ارزان اولوب شويله كه خانبالغده بر درهم و زننده اولان انجو لؤلؤ اوج درهم كموشه صاترلر و قره جانبنده اولان يرلرده دخى ياقوت و فيروزه و سائر جواهر معدنلرى چوق اولديغندن انلردخى غايت اوجوزدر و ممالك خطانك طقوزنجى قسمنه كولى ديرلر و اول ولايت غايت معمور اولوب شويله كه ادنى بازركانك سرمايه سى يوزبيك درهم اولوب و كاه اولور كه اولديارده اولان بازركانلر برييلده حكام چين اولان سلاطين خزينه سنندن اخراج اولنان عساكر خطايه نيجه تافتهء خام ملون اطلسلر و هر كمسيه‌يه ييلده اوج كره كيدردكلرى او چرجامهء زربفت و سائر اقمشه احسان ايلديكى و نيجه بيك قلماق خلقنه و جماعت هند و مسلمانلره كه عدده از و عزتده معزز و مكرم و بخشش و انعامده سائرلرندن زياده و يرلمكله محترم اولوب و تبت وايغو و اوجد و جورجت و سائر نيجه بيك خلقك متاعلرينى كولستانه كتوروب انده اولان بازركانلره صاترلر بعده اول متاعلرى اهل همدك شرق جانبندن كلان بازركانلر الورلر و اوننجى قسمى جاوه در و اول عظيم بندر در كه جميع هندك بندرلرندن اكا متاع كلور و مملكت چين بندرلرينك جمله سى اول بندره محتاجدر زيرا طرف جنوبى و مغربيسى ولايت هنده متصلدر جميع امتعهء هند خانبالغه اول بندردن كلور و ملك چينك اون برنجى قسمى حتن در كه سابقده